EL PAXARIN, LA VACA Y EL RAPOSU// UN CUENTU CASÍN.

1.- EL PAXARIN, LA VACA Y EL RAPOSU.

Pues señor, esto yera un paxarín que 'taba solín en el bosque, perdíu. Y yera xineru, y 'taba too nevao, y no había qué comer, porque con la nieve toes les yerbes y toes les semilles 'taben tapaes, y les hormiguines 'taben en el ñeru; y entós el paxarín 'taba muy, muy débil, y hacía tantu, tantu frío... que el paxarín cayó al suelu, y ya 'taba pa morrer... 

Y en esto pasó por allí una vaca grandona, pastiona, de eses vaques casines que hay pa'l puertu, y vió al paxarín en suelu, y como lu vió tan mal, decidió echar una cagada en suelu; una cagada grande, húmeda, que se veía que la vaca 'taba bien alimentá; y una cagada caliente, echando humo... y la vaca garró al paxarín co'l focicu y metió-lu dentro...

  

Y se conoz que con el calor, y la humedad, el paxarín remocicó un poco... 'Taba tan calentino... Y entóz el paxarín empezó a cantar, y a trinar, y 'taba tan con tentu... Pero entós pasaba por allí un raposu que, al oir al paxarín... garró-lu ¡y comió-lu!

¿La moraleja del cuentu? Muy fácil: No too el que te mete en la mierda te quier mal; y cuando 'tas metíu en la mierda, mejor no decir  ni pío. 



2.- UN CUENTU CASÍN

Esto yera un paisano de Campu Casu, Jamín "el tratante", que tenía munchu ganao porque los padres y los güelos habíen sido ferraores, y Jamín diba a toes les feries y a toos los mercaos (a la Pontona, a Cabañaquinta, a Corao, a Teverga...); y tenía ganao por too Casu, y tenía vaques en puertu, y tenía munchos praos... Y tenía un mayordomo pa que lu ayudare, Ramón de Bezanes, que diba con él a toos los laos, y comíen juntos, y de vez en cuando garraben unaborrachera juntos, y andaben por toos los mercaos. (Ojo, diben con los de la feria, pero no veníen con los del mercao). 

Y un día 'taba Ramón en el mercao del Campu, y 'taba un día muy guapu, y facía muncho sol, y había muncha gente... Y de repente Ramón sintió que lu 'taben mirando, así como si y clavaron los güeyos en la nuca; y volvió-se y había un forasteru vestíu de negro, embozau con un pañuelón,  mirando pa él, que Ramón nunca lu hubiera visto enantes; y como no y daba muy buena espina, Ramón entrugó-lu:

- ¿Tu quién yes? ¿Y porqué me mires? 

Y contestó el forasteru: 

- Yo... soy la Muerte. 

¡Meca! Pa que quiés más. Ramón echó a correr como un descosíu y allegó-se a la cuadra 'onde 'taba Jamín cuidando el ganao. 

-¡Jamín, cagonmimanto, acabo de topame con la Muerte en el mercao mirando pa mi! Dame un caballo que marcho pa  Arniciu! Si too va bien, esta noche duermo en Infiestu. 

Y como Jamín tenía caballos a esgaya dió-y el mejor caballo que tuviere, faltaría más. Y Ramón arrancó pa Infiestu. 

Pero Jamín no 'taba convencíu; Ramón, además de mayordomo,  era el mejor amigu que tenía, y no y hacía gracia aquél asuntu; además, dentro de poco yera la Feriona de Riañu y había que preparase... 

Así que Ramón marcho p'al mercao y, efectivamente, allí 'taba el forasteru de negro, solu, en el centro del mercau, gallasperu y perdonavides. Y Jamín marchó pa él de frente. 

- Oye, entós, ¿como ye que asustaste al mi amigu Ramón?

- Yo no lu asusté; ye que me extrañó tanto velu por aquí...

- ¿Entós porqué te extrañó?

- Ye que tengo una cita con él... esta noche... en Infiestu.